دل گپ سرباز

وَرِقه در بِمو بوردْمه سربازی  

کَلّه ره تاس هاکِردِنه دژبانی 

نظام جمع و رژه صدای شیپور  

هَمِش وِنا بوشیم تابع دستور

میدون تیر و صحرا و خشمِ شو 

قِرار نِدارِمْبی هَمِش دو به دو  

اَمه غذا  لوبیا،  عدس پِلا 

اَرمونِ ننای بَپته غِذا 

آفتابی روزِ گرمی و سوزِ شو 

مه چِکِلِ تَن ره هاکِردِنه او 

بیدار باش صِوی، غه‌ی فرمانده

خو وِسته لوچِمه، بَیمه درمانده

نگهبونی، تیناری و دلتنگی 

آزار دِنّه روح سرباز خدائی

مرخصی شومبه خِشحال و خندون 

دَگِردِستنِ ماقع اَسری بارون

بِبا مِسته دَق دَقه دِنه پیغوم 

کِلاه ره چَرخ هادی زود وونه تِموم   

ساعات شه سَر جا جه نَخِرنه تِکوم 

روز وِلار هایته، خِلمِت نَوونه توم 

مه کمر یِراق و تِفِنگ مِنه دوش 

کی سربازِ دلِ گپ ره کِنده گوش

دوستعلی علیخانی / آبان نود و هفت