در وصف پدر
دوبیتی های مازندرانی در وصف پدر
ته قلب پِر از محبت هسته بِبا
ته چشمون پِر از رحمت هسته بِبا
ته گب و صحبت پِر هسته از امید
ته وجود پِر از نعمت هسته بِبا
دوستعلی علیخانی
اَتّاشو بَخِسم مِن خو بَوینم
جانِ پییر ره روبرو بَوینم
وِنه تن ره بی درد و تو بَوینم
وِنه سَره می ره سیو بَوینم
فرشته احمدی
ته اِشا اِش مِره وَسّه پی یِر جان
مه دِنیا ته کفِ دَسّه پی یِر جان
ته وِسّه چل چلا این دار و اون دار
خونِشّه سَر دِنه مَسّه پی یِر جان
هادی اکبری
بمرده روز انی مه یار وونی
پِیر مار و خواخر، برار وونی
مره دئی روزه جا انه خنده
اسا بمردمه ویشار وونی
حسن رجبی
گندم وجو، هیچوقت پلا نوونه
صدسبیل دار، جان بِبا نوونه
وِنه واری رَفِق پیدا نوونه
بهارِ کَکّی، ته صدا نوونه
****
باهیرِم شِه پییِرِ،دوُشِ چُوقا
باهیرِم وِنِه دوُشِ، داز و هُوکا
صِوایی تا نِماشوُن، گوسفن هِمرا
وِنِه دوُش،دوُشتِرِه، سازُ، لَله وا
****