بِرو گالِشی ره شِه یاد بیاریم
ونه خاطره ِ ره فِریاد بیاریم
bero galeshi re she yad byarim - vene khatere re feryad byarim
تِه یاد اِنه ، طالب گالِشی رِه
زِِهره خاطر و اُون دل غَشی رهِ
te yad ene talebe galeshi re - zehre ye khater O on del ghashi re
گالِشی هاکرده پامال ویشِه
شِه لینگِ تُور بَزوئِه دَسِه تاشِه
galeshi hakerde pa male vishe - she linge tor bazoe daste tashe
اسا کو گالش و پا مال ویشه ؟
شِه لینگ تور بَزنه دَس تاشِه ؟
esa ko galesh O pa male vishe - she linge tor bazene daste tashe
اِسا کو گالِشُ کو منزل ِ سَر ؟
اِسا کو مِختاباد؟ کو ونه دلبر ؟
esa ko galesh O ko menzele sar - esa ko mokhtabat ko vene delbar
دیگه هیچکس سامُونه سَر نَزنِده
هیچکس پِرغال سَر ره پَر نَزنده
dige hich kas samonne sar nazende - hich kas perghale sar re par nazende
دیگه هیچکس نِسومِه یاد نیارنِه
خریمسه گالِش فریاد نیارنِه
dige hich kas nesomme yad nyarne - kheromesse galesh feryad nyarne
دیگه گوخِسه هِم گوک پا نِدارنِه
گوکپِه هِم دیگه معنا نِدارنه
dige gokhesse ham gok pa nedarne - gokepe ham dige mana nedarne
چَرده کاجه هیچکس سَرین نَکنِده
گوگ په ره گالِش ، نَفرین نَکنِده
charde kajje hich kas sarin nakerde - gohe pe re galesh nafrin nakende
کَملِ تَش دِنه کُوفا نَکِنده
کَمل کرچه داره اِندا نکنِده
kamelle tash denne kofa nakenne - kamel kerhe dare enda nakenne
نِماشون شِه گو رِه مار مار نَکِنِده
نِمک نَدنِه وتیمار نَکِنِدِه
nema shon she go re mar mar nakende - nemek nade O timar nakende
دیگه گالش تِلِمه پَر نَدنِه
تِلم پاس هِم دیگه دُو دَر نَدنِه
dige galesh telemme par nadene - telem pas hem dige do dar nadene
نِپارِ کیسه دیگه ، دُو نِدارنِه
اَنبِس دُو نِدارنِه ، بُو نِدارنِه
nepare kise dige do nedarne - anbesse do nedarne bo nedarne
سگلوچ خوارِ دله ره دو نکنه
سگسه ، لوت نکنه ، او نکنه
sag loch khare dele re do nakende - sagesse lot nakende O nakende
سیوک شه لُوهه ره از یاد بورده
ماچه بهیه ، وفا ره ، باد بورده
siuk she lohe re az yad baverde - mache bayye vefa re bad baverde
وِنِه کِتِه دیگه گیرا نَونِه
جانِوِرهِ قَدِ اِندا نَونِه
vene kete dige gira navonne - janevere ghadde enda navone
دیگه بالا هِمِندِ ، لَم سَر هایتِه
تَلی پایین هِمِندِ ، شِه وَر هایتِه
dige bala hemende lam sar haite - tali payin hemende she var haite
بالا چِشمه رِه خی ، اِستِل بَزوهِه
وِراز ، پایین چشمِه رِه ، خِل بَزوهِه
bala cheshme re khi estel bazoe - veraz payin heshme re khel bazoe
بالا کُهنِه تِلار ره تَش سر هایتِه
پایین خُوردِ تِلار ره لَش وَر هایتِه
bala kohne telarre tash sar haite - payin khorde telarre lash var haite
بالا کَلِک دیگه بِندا نِدارنِه
پایین کَلِک دیگه معنا نِدارنِه
bala kalek dige benda nedarne - payin kalek duge mana nedarne
گِلپرِ گوک دیگه ، زَنا نَونِه
گِلسر جوندِکا ، وِرزا نَونِه
gelpare gok dige zana navone - gelsare jondeka verza navone
گِلنارِ خالِکِ نَذری نَدِنِنه
گِلنازِ تِشکِ عروسی نَدِنِنه
gelnare khaleke nazri nadenne - gelnaze teshke arosi nadonne
گلدار گوک دیگه تپی نوونه
گلمارِ گوکِ اسم تتی نوونه
in geldare goke dige tapi navone - gelmare goke esm teti navone
گِلخوار،گوخِسه جِه ، چِمر نکِنده
گِلسار شِهِ دِمِسسهِ ، مِر نکِنده
gelkhar gokhese je chemer nakende - gelsar she demesese mer nakerde
گِلپا مَغزِه نَخِرد بی هُوش بَهیه
وِنه گیُون دیگه سَخت دُوش بَهیِه
gelpa maghze nakherd bi hosh bayie - vene gyum dige sakht dosh bayeie
دُوشا ، شِه گوکِسه ، شُو چَر نَشونِه
فِرام ، جُونِدِکاسِه ، اُون وَر نَشونِه
dosha she gokese sho char nashone - feram jondekase onvar nashone
تََلِم دیگه مُولِکی ، گو نََخِرنِه
علف بیوِر وُنِه مَنگُو نَخِرنِه
talem dige moleki go nakherne - alef bi ver vone mango nakherne
مارشَن شِه گالشسِه ناز نَکِندِه
وِره گالِش دیگِه هِمباز نَکِندِه
marshan she galeshse naz nakende - vere galesh dige hembaz nakende
جُوندکا سَره رِه از یاد بَورده
گوخِسه ی خاطررِه باد بَورده
jondeka sare re az yad baverde - gokhese ye khater re bad baverde
کو گالش بَهیره نَمدار چَرده
چَرده ره شِلِ انَجیلی دَونده
ko galesh bahire namdare charde - charde re shele anjili davende
کِرسِ ِ چَردِه کاجِه دَر بیارِه
چَردِه ره چَردِه زَنِه سَر بیارِه
kerse charde kajje dar bire - charde re harde zane sar biarea
کو گالش واشِسِه دار ره لو بُوره
خسته بَوِه ، وِنِه ساینا ، خُو بورِه
ko galesh vashesse dar le lo bore - khaste bavve vene saina kho bore
هیمِه رِه مِنزِل پِشت ، کَل هاکِنِه
کَتِل تَشِسِهِ ، دُوشِ ، وَل هاکِنِه
hime re menele pesht kal hakene - katel tashese doshe val hakene
کَتِل تَشِِ ، چِرَک چِریک ، بیارِه
اِزارِ هیمِه رِه ، سِسریک ، بیارِه
katel tashe harak chirik biare - ezzare hime re sesrik biare
اَنگِشته تَش وِسِه خِل بَزنِه
چَچیکلِه کِلینِ دِل بَزنِه
angeshte tashe vesse vesse khel bazene - hachikkalle kaline del bazene
کو منزل ِکلُ و اون پرکِ سر ؟
هیلا و هیلنشین و کرشک در؟
ko menzele kal O on pareke sar - hila O hil neshin O kereshke dar
بن کل بِلِه، موزی یا وولی
کو تیرک و سر اینگن و لد کلی ؟
ben kal bele mozi ya veveli - ko tirek O saringen O lad keli
کِله کو ؟ پِه کِله کو ؟ تش کِله کو ؟
شِمِالِ سَر، اَتی هیمِه بِلِه ، کو ؟
kele ko pe kele ko tash kele ko- shemale sar ati hime bele ko
کو گالش بخونده گلی به گلی
لَمِه سَر ، بَخِسِه ، پَلی بِه پَلی
ko galesh bakhonde gali be gali - lame sar bakhese pali be pali
شِه گو رِه امسِوی، این دیم بَورِه
فِردای صواحی ، اُون دیم بَورِه
she go re amsevi in dim bavere - ferdaye sevahi on dim bavere
اُون دیمه چِشمه سَر ره سَر بَزِنِه
این دیمه چِشمه سَر ره پَر بَزنِه
on dime cheshme sarre sar bazene - in dime cheshme sarre par vazene
اُون دیمِه واش پرازجه واشه بَیره
این دیمه واش پرازسه واش بَیره
on dime vash perazje vash bayire - in dime vash perazse vash baiyre
اون دیمه سامونه پرقال بزنه
این دیمه سامونه سه خال بزنه
on dime samonne pelghar bazene - in dime samonese khal bazene
ورف روز چکوسه داره لو بوره
ونه تِکمه ره سینه سُو بُوره
varf roz chakosse darre lo bore - vene tekeme re sine so bore
وَلگِسه این دار و اون دار بَگرده
واشسِه صحراره خار خار بَگرده
valgesse in dO on dar bagerde - vashesse sahra re khar khar bagerde
گالش کُو، ناله هادِه مِه ، هاکِر کُو ؟
کَلی هادِه بارِه گُوی چِمر کو ؟
galesh kon nale hade me haker ko - kalli hade bare goye chemer ko
اسِا کو کِریکِه ؟ کو نُوی گالش؟
گتهِ نُوی لَد ، کوهه اَفُتوی گالش ؟
esa ko kerike ko noye galesh - gate no ye lad koye aftoye galesh
جُولِه کو ؟ کَلِز کو ؟ کِتِرا کو ؟
شیردُون و لاقِلی و مِسکِلا کو ؟
jole ko kalez ko kettera ko - shirdon O laghely O meskela ko
شِره و پَش جِرِبِ کو؟ شبکِلا کو؟
کِلِک و لَم چوغا ، کُهنه قِوا کو؟
shere O pash joreb ko shab kela ko - kelek o lam hogha kohne gheva ko
کال چَرم کُوهه وَرف روز اُو دَکِفه ؟
وِنِه لِینگ زیز بَکِشِه ، شُو دَکِفه
kal charm koe varfe roz O dakefe - vene ling ziz bakeshe sho dakefe
رَنده و تاشِه و، اون وَل تاشِه ، کو ؟
دیزِنِدون و زَرین و گَت ِماشِه کو ؟
rande O tashe O on val tashe ko - dizendon O zarin O gad mashe ko
چِلی کو ؟ تُور کو ؟ تُور کِله کو؟
سُوسنگ و تِج داز و داز کِته کو ؟
cheli ko tor ko tor kele ko - sosang O teje daz O daz kete ko
کوهه رز و تال و زنگ و زنگله
سینه زیل و، دلب و، گت تال و تال کله
kohe rez O tal O zang O zangele - sine zil O delab O gat tal O tal kele
نَمدار شُورکَر و لاک و لوه کو؟
کچه و لَوکِته ، شیر پج لوه کو ؟
namdare shor kar O lak O lave ko - kache O lavkete shir paje lave ko
ماسَسر و شیرسَر و تازه راغون کو ؟
کشتاک و للی و اون کلوا نون کو ؟
masser O shir sar O taze raghon ko - keshtak O leli O on keva non kol
گل ماستی و ، سویِ شیر پلا کو ؟
لاک ِدله ، دم پختی ماس پلا کو ؟
gel masi O sevie shir pela ko - leke dle dam pokhty mas pela koe
کو زرینه ، کله ی دل بزنه
کلوا ره لا هاکنه ، خل بزنه
ko zarinne keleye del bazene - kelva re la hakene khel bazene
دوشتره ی دله ره چاشت بیهله
اتی شسه انبست ماست بیهله
doshtere ye dele re chasht beele - ati shese anbeste mast beelee
قند دَستمال دِله ی قَند گاز کو ؟
وِنِه یارِ دست بُفت جانماز کو
ghand dastmale deleye ghande gaz ko - vene yare dast bofte jane mast ko
خَلِه وَقتِ مه دلِ خُو بَوِردِه
مه داشتی نِداشتی رِه او بَوِردِه
khale vaghte me delle kho baverde - me dashty nedashty re O baverde
خَلِه وَقتِه سَرا رِه وِرگ بَزوئِه
مِه چش اَتا پِروک خُو چِک نَزوئِه
khale vaghte sara re veg bazoe - me chesh atta perok khohek nazoe
خَله وقته غم و غِرصِه مِه یاره
بِرار سبز علیِ دل بَیه پاره
khale vaghte gham o gharse me yare - berar sabz ali re del baye pare
خَله وَقتَه لَلِه رِه دَم دَنیِه
لَلِه چی هِمراه هَمدم دَنیِه
khale vaghte lale re dam danie - lale chie hemrah ham dam danie
خَلِه وقتِ گالِش کَلی نَدِنِه
مِنزلِ دِب بزوئه ، دی نَدنه
khale vaghte galesh kalli nadene - menzele deb bazoe di nadene
شاعر : قاسمعلی ایران منش
منبع : وبلاگ اساس
